رديه شايب وعجوز

رديه شايب وعجوز

السلام عليكم

مسائكم سكر ..

بدون مقدمات

اليوم رحت زياره لبيت جداني << جمع جد ههههههه

وصراحه صارت حرب ضروس بين جدي وجدتي بسبب اني جدي ناوي يروح للشام يبي له بنت شاميه يطرب نفسه تالي عمره

عاد جدتي ما اعجبها الوضع وثارت الغيره عندها << تحسب عمرها عشرين على غفله هههههههههاي << تراه ماتسب

وانا جالسه بينهم مره اوقف بصف جدي ومره اقلب عليه واصير مع جدتي << ماتفتن بينهم

ما لكم بالطويله الموقف اثار قريحه الشايب وجاب له قصيده يستفز العجوز فيها وهي عاد ما قصرت ردت عليه بردت حرته فيه ههههه

عاد يمكن تكون القصيد ماهي موزونه بس تعتبر موهبه ما تشوفوني حطيت الموضوع بقسم المواهب الشعريه << برا شيبان وموهبه ماتجي ههههاي
الشايب :

نبي نروح الصبح والدرب مفتوح ***** من فوق جيب (ن) منوه اللي يقوده

وقت السحر ماشين والخط ممسوح ***** والعصر الاردن داخلين حدوده

نبي نجيب اللي لها المال مطروح ***** الجادل اللي تو زمه نهوده

العجوز:

حطيت لك يالعود ما ينعش الروح ***** مير انت رايك ماوصلنا حدوده

تناظر غرانيق لها الباب مفتوح ***** وتراعي اللي صافيت(ن) خدوده

لبسه قصير وستره الرأس مسلوح *****ملّك وجابه ما سئل عن جدوده

توذيك باللجات والمال متنوح***** مجهولتن ماينعرف عن سدوده

ناظر الغزلان لها البال مشروح *****مكاسر العنبر مثاني عضوده

بني الحمايل لشوفهن تجلب الروح *****مصيونتن محدن دنى من حدوده


نسيت اقولكم تراها حصريه وطازجه اليوم العصر صار الموقف ..

دمتم بحفظ الله .

الموضوع الأصلي: رديه شايب وعجوز || الكاتب: أڜۉاڨ || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

صح لسان جدانك

وماشاءالله متمكنين ويلعبون على المعنى

إلا وش رايك تطقين لهم لابتوبات وتخلينهم يشاركون معنا وينعشون قسم المحاورة هههههههه

وابياتهم ماشاءالله موزونه ماعليها كلام

وظنتي كان ماني واهم أنهم متعدين مرحلة الموهبة ههههه

يعطيك العافية ومشكورة على نقلك الحصري.

هههههههههههههههههههههههههه

الله يطول في عمرهم

ماشاءالله خوش رديه بس العجوز ردها وافي

لاهنتي . . . على ايرادها بارك الله فيج

تحياتي لج بود

تم التقييم

مسير بن شبلان

اي والله مسوين محاوره غير شكل ههههههه

لاهنت على ردك اخوي

بعيد الهقاوي

والله حلوه فكره الاب توب بس وش رايكم تحطون قطيه لانه انتم المستفيدين ههههه<< لا والله انتي المستفيده هههههاي

صدق موزونه انا ما اعرف للقصايد بس توقعت ان رديتهم ضاربه الشعيب من ناحيه الوزن يالله من قدهم صارو شعراء محاوره جداني ياااالبيه بس

اما من ناحيه الموهبه ا وينهم وين الموهبه هم الحين متعدين مرحله الشيخوخه الله يختم لهم بالجنه يااارب

الله يعافيك اخوي شرفني ردك

محمد بن حلبيد ..
دووووم هالضحكه

امين الله يطول بأعمارنا جميع

اكيد يبي يكون رد العجوز وافي لانهااا ذابحتها الغيره على الشايب هههههههههه

تشرفت بردك اخوي الكريم

مشالله

الله يطول باعماارهم

ويخليهم لكم

ويهدي شايبكم لاياااخذ على بنيتنااا

^ _ ^


يسلموا المملووحه

جمره مطير

امين يالغاليه

وان شاء الله مايكتب الله زواجه اهم شي مشاعر جدتي ما تنجرح ههههه

تشرفت بمرورك لاخلا ولا عدم

اي والله اهم شي مشاعر العجوز ... لا يعرس عليها ثم يصير بجدتك شي


عسى عينه للبط .. من نوى العرس على ام عياله


والله لايبارك بـ قناة غنوى .. فطنت الشباب والشيبان



المملوحه

صح لسانهم وزين تسوي فيه جدتك ^_^

الله يطول بإعمارهم
وصح الله إلسانهم
ولاهنتي على إيرداها لنا

رديه ممتعه

.
.

ع ــوآآفــي
وصح لسسان شيبانج






..

ههههههههههههههههههههههه



العجيز كفو



لاهنتي على الأيراد