امس الضحى عديت في راس مرجوم=ساقتني الاقدار قبل القدميا
غديت انا والريح والثالث الحوم=ومشاعرن عقب المواصيل ضميا
اليا جلست اشوي فزيت واقوم=واليا وقفت اشوي ضاق النسميا
وحولت من عاليه والقلب مهموم=ونكست عن طرد الغرام العلميا
قصرن بنيته واصبح القصر مهدوم=حل الفراق ومابنيت انهدميا
عزاه يامحمد غدى القلب محروم=الحض عن هاك الغزال انخدميا
ابو جديل اشقر وابو نهد مزموم=ونجلن زرقني منهن بالسهميا
ومعنقن منتوق والردف ملحوم=وعين اشقرن للخارمات انصرميا
اقفى وخلا بالحشى هم وارسوم=وقصه غرامن جف منها القلميا
عليه قلبي يابن الاجواد مثلوم=يالمويس حالي بالفراق انعدميا
امشي وكني بين الاجواد منجوم=عزي لحالي ياحياه الندميا
دونه بني عم وقرابات واسلوم=ولولا الحيا دمعي عليه انهشميا
والراي مطلوبن على كل شغموم=وانت رفيق وبالرفيق احتزميا

جاني جوابن حرم اعيوني النوم=والقاف في وسط الضمير التطميا
ودخلت لي في غبه افكار وهموم=والسالفه ماعاد فيها وهميا
نايف شكى ليه وماقال مفهوم=والقلب للمعنى الصحيح استلميا
وعلى حسين الوصف ماهو بمليوم=والراي مني يابوطفره لزميا
اصبر وما يكتب على العبد مقسوم=ولو قلت مالي من عيونه سلميا
مير ارض بالواقع ولاينفع اللوم=ولافات فايت مايفيد الندميا
والحب سهمه يابن الاكرام مسموم=وكم واحدن قبلك قتيل السهميا
وانته تعرفه ماتبى فيه تعلوم=وحنا على فزعتك على ولميا
لو كان اهل زين التواصيف لك قوم=العرف ترضاه العرب لحتكميا
والناس الها اسلوم مافيه معدوم=لاتنكس الاعلام قبل الشيميا
اصبر ولوك من عنا الحب مزحوم=وعساك من مغليك ماتنحرميا
وحنا نبا نفزع ونمشي من اليوم=والراي والخطه تبا ترسميا
ابشر بعز وفزعه اشيوخ واقروم=ومن قال وين امطير ماينهضميا
ربعن تسوق المال وتعلي السوم=وان عاندت تلطم ولاتلطميا
وتمت بسم خلاقنا اللي له انصوم=اعداد من صلى وطاف الحرميا