توه صغير وسلني بالهوى سل ... رديه بدر بن صاهود وفهد الهيت الله يرحمه

#1 11-05-2010, 04:21 PM

توه صغير وسلني بالهوى سل ... رديه بدر بن صاهود وفهد الهيت الله يرحمه

السلام عليكم ورحمة الله وبركاته

مساء/ صباح
الخير

هذي قصيده قديمه للشاعر بدر بن صاهود وهي موجهه
للشاعر فهد بن جاسر رحمة الله عليه

ماراح اطول عليكم

اليكم قصيده الشاعر

بدر بن صاهود

قم يانديبي فوق خمسميه أس ال=بنزٍ جديد ويعجبك زين ممشاه
عبه من البنزين لينه يفول=وأحسب حسابك بآخر اليل مسراه
أعبر حدود المملكه وأحذر تزل=مع الرقيب الي على الحد تلقاه
عطه السلام وأخذ سلاماً وعجل=ثم ودع الرقعي وودع هماياه
نصه لدارٍ دامني حي مامل=مامل شوف الدار وأحب طرياه
عند اللصافه طلعت الشمس حول=وأنشد عن الصاحب ولا بد تلقاه
فهد ولد جاسر عسى الرب يمهل=يمهل بعمره والمنايا تعداه
سلم وقله يافهد نبغي الحل=ترا الرفيق بحزة الضيق نلقاه
ترا رفيقك يافهد حاله معل=بسباب غرواً عذب القلب وأشقاه
توه صغير وسلني بالهوى سل=ماشفت والله بالجزيره حلاياه
وصفه قمر خمسة عشر كل ماهل=ولا كما اللولو حلايا ثناياه
والخصر عود الموز لامن تمايل=وجديلته سبيب شقراً محذاه
والعين تشدي عين ظبياً مجفل=يلخس قوانيصاً وطت داخل حماه
أدعج غنج بالزين كامل مكمل=لاوهني منهو رشف من محياه
وياسعد منهو حط زين النبا خل=في دنيته وبجنة الخلد يلقاه
تكفى يابو جاسر تراي اتوسل=وفزعتك تبريلي جروحاً مخفاه
وصلاة ربي عد ما ماطراً هل=على النبي الهاشمي طاب مثواه

وهذا رد الشاعر

فهد بن جاسر الهيت رحمة الله عليه

قم يانديبي فوق معسوفٍ أشعل=أشعل على الدرهام روحه مظراه
عريض جنب ومركبه كنه الزل=شوفه يبعد كل همٍ ويمحاه
ولد الفلانه جدته شيخة البل=وأبوه من عبدان طنبه ومنشاه
يقطع فياض الدبدبه ماتملل=يزين الخدان في زين ماطاه
اليا رثع كنه شمالي مسرول=الي علا بلحوقه الخرب وأدماه
واليا مشى ظهره يشادي المخمل=ولاكما ريش النعام المصفاه
فوقه غلامٍ للمواجيب كمل=أصله من الجبلان ساسه ومجناه
قرمٍ على قطع البوادي تحمل=منشان خطي ياصل اليوم ملفاه
حزة مراحه قلت ياصاحبي شل=هذا الجواب ودخله وسط مخباه
وحزة مراحه قلت ياصاحبي صل=وأنخ الكريم الي يداريك بحماه
وأغبش مع الجهمه على صحوة الكل=خل العرب تشوف شين فعلناه
وأنص الكويت وبالك الدرب تجهل=وخل الجدي من بين عينك تنصاه
واليا وصلت الدار بالك تطول=أسئل عن اللامي فهودن مرباه
لازم يدلونك على البيت الاجمل=الي منازيله على العز والجاه
واليا لقيت الشيخ قله بالاول=وأحلف عن المفرود وأطعم من الشاه
واليا خلصت من الغدا باللبن حل=وعطه جوابي من يمينك ليمناه
ترا جوابك يابدر جاني بحل=يوم الخميس وأسعد القلب وأبكاه
جاني كلامٍ ريحته ريحة الفل=كلام شاعر صخر القاف وأبداه
كلام شاعر يشكي الحب والذل=وأنا ترا فدوه لراسك وشرواه
تقول تكفى صابني رمشن أكحل=الي تحداني بزينه ولاقواه
توه صغير وقلبه القاسي أمغل=وشلون اسوي يافهد مقدر أنساه
أقول أصبر يابدر لازم أتدل=مفتاح سره وين دسه ونقراه
ونته توصفها على الموز بالكل=وتقول عود الموز ياكنه أياه
وأقول عود الموز يربى على الظل=لابد من يومٍ ينعطف لك وتجناه
ونته توصفها على الظبي بالذل=وتقول خلي ياخذ الظبي بشباه
وأقول أصبر وأقتفي الظبي وآدهل=لابد من يومٍ يعجبك حيل مرماه

وسلامتكم

أتمنى ان تنال على اعجابكم

وترقبو رديه فريده من نوعها تتكلم عن تاريخ الجبلان
بين الشاعرين المذكورين راح انزلها يوم السبت ان شالله
ان الله احيانا

أخوكم / عبدالعزيز بن لامي