الجيب (عبدالكريم الجباري )

الجيب (عبدالكريم الجباري )

الجيب والقرناس وخوة هل الطيب = تسوا مقابلة العرب فالمدينه
ما أسبهم واعرف انا مابهم عيب = بس الهوى ياهل العوى حدلينه
عزبه وخيمه والصحاري مضاريب = وابو ثلاث شهور تو صالخينه
ومعلقينه من كراعه على الجيب = والبن الاشقر تونا حامسينه
شبت حطب ماهي بشبت عياسيب = ارطه وعرفج يمنا حاطبينه
واليا سنت شب الجمور اللواهيب = قام المقهوي قرب الما بدينه
ركب دلال مجلدات المقاضيب = رسلان من سوق الحفر جالبينه
صفر(ن) تلالا يطعمن المشاريب = تبعد عن نفوس العباد الغبينه
واليا احتما ماهن يشيل المراكيب = يحط كيف(ن) بالنجر طاحنينه
فنجال ونص وردهن يمه قريب = وجاب البريق وسكره في بطينه
وحطه على صفت هذيك المهاذيب = والبن فاح وركده في سكّينه
وجاب الدلال اللي يعرف المواجيب = ثنتين غير اللي بهن عاملينه
مجنون كيف ورتب الامر ترتيب = حط البهار وريح هيله يا زينه
ثم زلهن لين استوى باخر السيب = وحطه بناره ربنا لا تهينه
وقال اقدعوا تمر(ن) حلو توه نجيب = اخلاص من دار الحساء محضرينه
ثم صب فنجاله ومابه عذاريب = والله على الفنجال تسلم يمينه
مجربن ماهوب يحتاج تجريب = ايوالله انا كلنا مجربينه
مافيه ضيف وكلبونا معازيب = والشاي خدّر والورق حاكرينه
وعقب القهاوي والسوالف مطاليب = كلن يناظر للمواتر بعينه
نبي نهيف قوق رووس المراقيب = ونفرع القرناس لجل السمينه
اليا خطفها خطفت(ن) فالمخاليب = تبري النفوس الضيقات الحزينه
واليا انتهى المقناص جبنا مكاسيب = والحر الاشقر عقبها مبرقعينه
ونمشي ونلقى يمنا فطر(ن) شيب = ومفرود يطرد من ورى امه تنينه
وسط النفود ولا نمر الشخانيب = نخاف من ضرب الحصى فالمكينه
ووساع صدر ونطقنا بالتراحيب = وعقولنا هي العقول الرزينه
ياليت لي دور(ن) بغوج الاطانيب = وانسى حضارات الخراب وسنينه
((اخير من طرد البنات الرعابيب)) = واحدن تسمع من عذابه ونينه
ممشاي صح وخوتي للاشانيب = ورجل(ن) يصد عن المراجل ياشينه

الموضوع الأصلي: الجيب (عبدالكريم الجباري ) || الكاتب: صافي الاحساس || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق