الحلم

الحلم

الحلم / حامد زيد
وقت من البطا وبليل تراقص شياطينه
بعد شفت الضياء ينزع من ثياب المسا الثلثين
تحايلت المنام اللي مثل بيتج تمرينه
وأنا اللي من تفارقنا وأنا ما غمضت لي عين
غريبه كل حلم يمر في رقادي تزورينه
والأغرب كيف أحلم الحلم وأرجع وأحلمه بعدين
قبل يومين شفتج بالمنام وقمت من حينه
ونمت أمس ورجع نفس المنام اللي قبل يومين
أنا اللي قبل أسافر شلت قلبي من شرايينه
تركته في يدج مثل أمانه وأحفظيها زين
ترى حفظ الأمانه دين مجبوره تردينه
أجل ما في قد أحد قالج حفظ الأمانه دين
مرد المقفي بيلفي ويستوفي وتوفينه
بعد ليله ثلاثه أربعه عشرة شهر شهرين
اذا انتي منتي بقد الكلام اللي تقولينه
حرام استأمنج حاجه واذا جيت أطلبج تنسين
تخونين وتبين ارضى و أحد يرضى تخونينه
انا لا جيت اخونج مع حبيبه ثانية ترضين
من أول ما رجعت من السفر ما شفتج لج بينه
وأنا اللي كنت أحسبج قبل أدوس ارض المطار تجين
تكونين انتي أول شخص عيني تحتضن عينه
وكنت أتخيلج من زود فرحة رجعتي تبكين
وأشوف بدمعتج حكيج وأعرفه قبل تحكينه
وأجيب أحلى من اللي بتحكينه وأتركج تحكين
تقولين الوطن نور وأقول بنور مضوينه
تقولي لي غديت أحلى وأقول عيونج الحلوين
كلام نام بشفاهج وخفتي لا تصحينه
ذخرتيه لغرام اللي ينام ويتركج تصحين
تغانمتي غيابي لين رجحتي موازينه
تعلم من يدج لمس الكفوف وعلمج تجفين
وليته لاقيت به شي فيني ما تلاقينه
ما هو بغرور لا كن خابرج مالج أمل تلقين
تغافلج بغلا و الا الحلى ما هوب من زينه
تزينه الصور بس الصحيح ابن الحلال زوين
وأنا ماني بناقص عنه يوم انج تبدينه
نصيبي هو نصيبي لو يسددها من الصوبين
قنوع بمظهري والسم ما يذبح ثعابينه
على قول المثل ماني حلو لكن ماني شين
اذا اهداج الزهر مرة فأنا اهديتج بساتينه
واذا ألهاج بفرح ليله فأنا تهت لبكاج سنين
واذا استضعفتج املاكه وشتتج ملايينه
انا حتى فتات الخبزة اقسمها معج نصين
طموحي بس اجي واظفر بشي تستحقينه
تدينته تسلفته سرقته مو مهم منين
كأني من كثر ما أرضى بكل اللي تتمنينه
لو انج تطلبين الله يعنيني بقول آمين
أنا ما ألعب على الحبلين وقت الطيش وسنينه
تبين الحين يوم اني كبرت ألعب على الحبلين
ترى عند البدو بالذات عيب اللي تسوينه
حلاتج لا عشقتيني تعشقيني ليوم الدين
غرام نسكن ضلوعه حشيمه من مجانينه
جفا يجمع معزتنا ولا عشق يذل اثنين
كثار اللي تحدوني وقالوا لي تحبينه
أمانه لا تخليني صغير بعينهم تكفين
لأني كل ما قالوا تخون أقول مسكيــــــــنه
عليج الله وأمانه علميهم منهو المسكين
أنا خايف لا طاح الجمل تكثر سكاكينه
وأنا ما عادت ضلوعي تحمل طعنة السكين
مثل ما قالوا المكتوب واضح من عناوينه
لو أرحل منج للغربة بسافر من ظلامج وين
كفاية كل حلم يمر في رقادي تزوينه
كفاية من تفارقنا وأنا ما غمضت لي عين
قبل يومين شفتج بالمنام وقمت من حينه
ونمت أمس ورجع نفس المنام اللي قبل يومين

الموضوع الأصلي: الحلم || الكاتب: بنت مطير || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

قصيده رائعه لحامد زيد..

تسلم يمناج يالغلاااا .. على النقل المميز..

تقبلي مروري..

دمتي بووووووووووود..

يعطيج العافية اختي ريمووووو
يسلمو على المرور