قصة غزو العجمان للدويش بالصمان. الصليب

قصة غزو العجمان للدويش بالصمان. الصليب

السلام عليكم ورحمة الله

في يوم من ايام الله واذا براكان بن حثلين شيخ العجمان يرسل مرسوله لسلطان بن الحميدي الدويش وهو مربع بالصلب ويقول علم سلطان يخلي الصمان خلال ثلاثة ايام والا ترانا مصبحينه (وفي وقتها الناس يصدقون القول ولا يخدعون ).
بالفعل ثالث يوم واذا ابن حثلين ومعه كل العجمان ومستفزعين المره وموعدينهم بعطية من الصمان وكانوا يقولون المره للعجمان اما لنا اللهابة او اللصافة (هذا قبل الغزوا على مطير ),
عندما وصل العجمان الصلب والصلب ليس به الا فريقين من مطير على راس سلطان بن الحميدي الدويش وحصل الطراد العشي وقتل ابن درجان وعند حلول المساء قال الفارس راكان ما حنا هاجدينهم خلو الصبح ونصبحهم , وكذلك الدويش ارسل السبور ليتعرفوا على اعداد الغزاه فرجعوا للدويش وقالوا له امم كل العجمان والمره جايين لك يابن وطبان ..واذا هو ليس حوله من مطير احد فقال ارحلوا الى بقية مطير وبالفعل رحلوا ولم ينزلوا الا بالبطين شعيب الأرطاوية بين مطير .

قصيدة راكان

ياركبا مـن عندنـا فـوق شقـران =سـواج مـواج بعيـد المضاحـي
اسلم وسلم لي على الشيخ سلطـان =زيزوم علوى مبعديـن المشاحـي
يمشي وينشد عن منـازل فنيسـان =يبغـى بـداري قامـة وانبطاحـي
والدار حامينـه بخيـل وصبيـان =اهل القنـازع دايسيـن الملاحـي
العذر منك يالصبي يا ابن درجـان =ان حن فهقنا الكون نبغي الصباحي
يا ليت كان اصبحت يا نسل وطبان =يصبح عليك من الهواشم صباحـي
خليت عشب الصلب يومي بالأردان =خضر تومي به هبـوب الرياحـي

بعد ذلك وبعد ان استقر راكان بالصلب اراد المرة اللهابة والا اللصافة كما وعدهم فقال راكان اللهابة واللصافة للعجمان وانتم اردم وبره فغضب المرة وارادوا ترك راكان , وذات يوم بوقت الربيع وراكان على اعلى قمة مرتفع واذا بفلوة تلعب فقال راكان

قصيدة راكان

الفلو يلعب يحسب ليال الرخا دوم =ما يدري الزمن وش هو مخرٍ له
علوى وراه ونصف يام غدوا قوم =وليا طلع مـن علـة جـاه علـة

واعدو العدة مطير (علوى فقط )وبعد برهة من الزمن ارسل الدويش مرسوله الى راكان بن حثلين فقال له انت لم تعطيني الا ثلاثة ايام يوم تغزينا ما يمديني اجمع مطير وديارها وسيعه مير الله عطاك عشرة ايام وبعدها ترانا مصبحينكم .

وبالفعل اليوم العاشر واذا بسلطان الدويش وفرسان قبيلة مطير بالصلب وقبل ذلك ارسل ابن حثلين سبوره للدويش فرجعوا له وقالوا جموع مطير جايينك يا راكان قال راكان وهو الفارس المغوار (ما هو بعيب نخليها مثلهم يوم اخلوها) .
وبالفعل رحل راكان بالعجمان الى وادي العجمان وترك الصلب وعشبها يومي بالأردان .

قصيدة دعسان الدويش

يا راكب من عندنـا فـوق ضبيـان =مفتـل الذرعـان حـرٍ شنـاحـي
كنه يباريلـه مـع الجـو شيطـان =لولا الرسن ما ينمسـك باللواحـي
اسلم وسلم لي على الشيـخ راكـان =مبـدل الصلـب الحمـر الألاحـي
ثم انشده وش صار علمه وش كـان =هو ليه عن دار نزل فيـه راحـي
يا امير جيتونـا بضعايـن وسلفـان =وجبت المره معـك يابـو فلاحـي
وحنا فريقين علـى بيـت سلطـان =لاخذت مال ولا سهجت المراحـي
والصلب لا ياكلك مثل ابن درجـان =ويبقى فلاح وحيـد مالـه مشاحـي
لابد من نمـراً علـى وقـت الأذان =ممليتٍ بأهـال الغلـب والرماحـي
ليا جالها مع خطـوة القـاع دنـدان =ثم اختلط عج الرمـك والصياحـي
يلقى العشى مع دربها الذيب سرحان =وجاء للضباع العرج سرح ورواحي
عساك تسلم يـا سلايـل كحيـلان =وجعلك تناجى يوم كثـر الطياحـي
ما تستوي للموت يا طيـر حـوران =مير ان بعض القول ماله صحاحـي
تشره على دار ولاه ابـن وطبـان =بخضر النمش ومذلقـات الرماحـي
ما احدٍ عطاناهـا عطيـه وسفطـان =الا بغـارات هـجـاد وصبـاحـي
ويا ما بغاها مـن قبايـل وعربـان =وعلوى على جرد السبايـا تناحـي
عنها نحو بالسيف غازي وطمعـان =لين ابعدوا عنهـا وسـاع المناحـي
عندك خبر يا امير مانـي بغلطـان =وترى كلام الظلـم سـم ذحاحـي
ماتستوي للموت اطيرحـوران =مير ان بعض القول ماله صحاحـي
تشره على دار ولاه ابـن وطبـان =بخضر النمش ومذلقـات الرماحـي
ما احدٍ عطاناهـا عطيـه وسفطـان =الا بغـارات هـجـاد وصبـاحـي
ويا ما بغاها مـن قبايـل وعربـان =وعلوى على جرد السبايـا تناحـي
عنها نحو بالسيف غازي وطمعـان =لين ابعدوا عنهـا وسـاع المناحـي
عندك خبر يا امير مانـي بغلطـان =وترى كلام الظلـم سـم ذحاحـي

منقوووووووووول

الموضوع الأصلي: قصة غزو العجمان للدويش بالصمان. الصليب || الكاتب: قلب الذئب || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::

تعليقاتكم البناءه هي طريقنا لتقديم خدمات افضل فلا تبخل علينا بتعليق

يعطيك العافية.....


لاهنت على القصة

وعليكم السلام ورحمة الله وبركاته

لاهنت يالذيب على نقل أحداث القصة

قلب الذئب يعطيك العافية على نقلك لمثل هذه القصص. وبارك الله فيك.

الجبلي

الشعلي

بعيد الهقاوي

مشكووورين على المرور الطيب.

اخوي قلب الذيب لاهنت على ماكتبته اونقلته عن هذه الوقعه ولاكن ودي انك ماتكتب شي متكرر
في هذا المنتدا فالقصه ماجوده بالتفصيل في هذا المنتدا وانا الي حررها حرف حرف ولادي ان الموضوع يتكرر
وكرما من المشرفين الموضوع المتكرر يحذف
وتقبلوا تحياتي

يعطيك العافيه

ولاهنت ع القصه

تسسسلم يمنااك

لاهنت ابوي علي نقلك القصه

يعطيك العاافيه

ولاهننت على الموضووع ,,,

مشكوووووووووووررررررررررين على المرور جميعا يعطيكم الف عافية .

اخوي طقها ولحقها الموضوع منقول يابعدي مادري انه لك واللي تبيه سوه يالذيب مابيننا شيء .