لاضاق بالي فالقصايد تسليت=وترجمت فكره ماطرا فالساني
اغيب فالهاجوس لااقبلت واقفيت=اغيب في فكري وانا في مكاني
موجود بعيون الملا ماتوريت=لوكان دالوب المعاني خذاني
لادق هوجاس القصايد وغنيت=للفكر والمعنى معي ترجماني
لاجيت في سوق الجزايل تنقيت=اخذت مايطرب صميم الاذاني
انقا فرايدها على ماتمنيت=والياعصتني زدت والعمر فاني
خليت مايفرح وجيه السرابيت=واخذت مايفرح اطوال اليماني
فالشعر لي مبدا وموطن ولي صيت=واشوم للعليا واكب الطماني
درست من سود السنين وتقهويت=وكتمت همي حدر عوج المحاني
عانيت من ضيم السنين السواحيت=وجاملت وقتن باعني ماشراني
ياما على روس النوايف تعليت=وياما وقعت وقمت مثل الحصاني
(ولاضاق
صدري يم
الاصقه تعديت)=اخذت منها عبرتي وامتحاني
قعدت ارددها ليا اصبحت وامسيت=بيني وبين النفس دون العواني
الذكر يبقى حي لو صاحبه ميت=يطلع كما الاول مهو مغلطاني
جاملت بعض الناس واليوم مليت=ماني مجامل واحدن مادعاني
اللي يرحب قدم وجهي ليا جيت=وانغبت من هرجه لقيت الحساني
يشذب عراقيبي ردي التثابيت=والجدي ثابت ياسهيل اليماني
حفضت مايملي علي وتعديت=غيري ولو شانه اصدوف الزماني
ارفع يدي لخالقي حامي البيت=واصد عن منه فلان الفلاني