هب النسيم وطيب خلي تمثنـاه= تقول كنه مـر حولـه وحافـه
لاواهنيك يالهـوى يـوم تلقـاه= تلقـى النعومـه كلهاواللطافـه
يستقبلك حلو الوصايف بيمنـاه= وتاخذ على الجسم اللطيف التفافه
وتنزل مع اطرافه وجيده وترقاه= وتموج مابين الترف والنحافـه
وترفع جديله عن متونه وتغشـاه= لبـا ليانـه يالهـوى وانعطافـه
ويصادفك نور البدر في محيـاه= ويغشاك من ليل الجدايل كثافـه
وتخالط انفاسه وتلمـس شفايـاه= وتردك كفوفه بلطـف وظرافـه
تبرد على كفه وتبرد علـى فـاه= وتعطرك ريحة حيـاه وعفافـه
تفتنك نظراته وروعـة سجايـاه= وتشدك الفـاظ الادب والثقافـه
ماخلق في جيله من الناس حلياه= ماله شبيه ومال حسنه وصافـه
غرو ٍ لعوب ٍ تل قلبي من أقصاه= حلو النبا على النقـا والنظافـه
في كل ليله يحتفل مـع مرايـاه= ماكنـه الا يستـعـد لزفـافـه
سمح المحيا كامل العز والجـاه= يلقى نسيمك معه حسن الضيافـه
تدرج عبيرك يالهوى في زواياه= وتنسى معه حر الهبوب وجفافه
والله ورب البيت ماعاد تسـلاه= مر ٍ تجي قدمه ومـر ٍ خلافـه
واليا غشاه النوم والنـور طفـاه= يحول من بينك وبينـه لحافـه
سج الخلا وارقى السحاب وتعداه= واحمل معك عطره وطيبه وقافه
تلقالي اللي كـل ليـل أتحـراه= لو كان من دونه بعيـد المسافـه
أشتـاق لـه وأتخيلـه وأتمنـاه= وأدرى على سره واخاف إنكشافه
أسج مع طرياه وأصحى لطرياه= صار الغلا بيني وبينـه كلافـه
طراه مدري يالهوى ويش طراه= طيب النسيم وخافقي وإنشغافـه
أنا أشهد إنه علـة القلـب ودواه= وأنا أشهد إن عقبه حياتي حسافه
كان الهوى مره وشافـه وخـلاه= أنا أشهد إنه يوم مـره ماشافـه

الموضوع الأصلي: هب النسيم وطيب خلي تمثنـاه || الكاتب: نوف || المصدر: منتدى الجبلان الرسمي

المصدر: ::منتدى الجبلان الرسمي::