راحت ثمان سنين حل وترحال=راحت ثمان سنين كلها مدلهمه
قضيتها بالحب والشوق رحال=بشوقٍ تحدى كل ياسه وهمه
سألت عنها سنين وشهور وليال=ولا فيه فج ٍ غير وجهت يمه
وعقب الثمان اللي تعبها برا الحال= جاب الزمان الكارثة والمطمه
جاني ولدها مبتسم بين الأطفال= ومن بسمته ذكرت أنا بسمة أمه
شفته وصاحت داخلي كل الآمال=بصوتٍ عجزت بكتم الأنفاس لمه
وركضت له دمعي على الخد همّال=ومن كثر شوقي قمت بالحيل أضمه
ولحظة حضنته والطفل في يدي مال=شميت ريحتها على أطراف كمه
واستلهمت نفسي مقاديم الأهوال=وتم الضياع وأكدت لي متمة
ليت الغياب اللي شغل غربتي طال=ولا دور العاشق على حرق دمه
واليوم بنت الناس في بيت رجال=حبٍ على غير الشرف لي مذمة
مجبور أعود وأشتكي كل الأميال= بنفس ٍ حزينة كائبه مستهمه
أرجع غريبٍ مسكنه بر ورمال=يموت ..يحيى.. يندفن..ما يهمه