ياغايبه وان كان فيها جماله = تجملي يام الحلا والظفاير
بالله شوفي صاحبك كيف حاله = شوفيه في غيبتك وشلون صاير
صارت حياته ضيق خلق وبطاله = هم وسهر واوراق شعر وزقاير
يعني حبيبك صار حالته حاله = ما باقي الا انه يدن العباير
الله لامنه ذكر ما مضاله = قبل الدواير ماتجر الدواير
يوم الطفوله والشقا والجهاله = يوم الكباير في عيونه صغاير
ايام كان معانده راس ماله = ويسوق له بال الشقاوه بشاير
ياما امتلى بالحب والطيش باله = وياما امتلت من شخبطته العواير
يكتب عليها عاشقك للثماله = ويخط توقيعه جريح الضماير
ياما اشتكاه ابوج في بيت خاله = وياما تحصل من هواك العزاير
مره حلف بانه يبطل هباله = وقبل يكمل فك اخوه الستاير
ثم طالع الشباك لينك قباله = وباقل من لمح البصر جاك طاير
على صغير سنه مميل عقاله = كاشخ وناسي لا يصك الزارير
ولا شافك يتمتم لحاله فحاله = لعيون هالشوفه تهون الخساير
ولا شاف زول ابوك حذف نعاله = الحب جاير لكن العود جاير
طفلن يتيم ورغم الاحزان داله = ما يدري ان حظه مع الوقت باير
كنتي طموحه كنتي اغلا حلاله = كنتي وصرتي بس يام الظفاير
طفلن زرع من ضحكتك في خياله = لين اثمرت شعرن نزاله حراير
لا تتركينه في غيابك لحاله = بالله شوفي كيف هالطفل صاير
وحده بوحده كان عندك عداله = تبطلي غيبه وابطل زقاير

الموضوع الأصلي: وحده بوحده || الكاتب: صافي الاحساس || المصدر: منتدى الجبلان الرسمي

المصدر: ::منتدى الجبلان الرسمي::