رديات بين الظمني وصحن بن قويعان والخس

بسم الله الرحمن الرحيم

رديات غزليه .. من عمالقة الشعر النبطي .. مفرح الظمني .. رحمة الله عليه .. ومحمد خلف

الخس .. وصحن ابن قويعان .. الله يطول في اعمارهم .. ويعطيهم الصحه والعافيه ..

عندما شاهد .. الشاعر مفرح الظمني .. رحمة الله عليه .. بنت مزيونه وهو في الطريق تمنى

ان الشعراء محمد خلف الخس .. وصحن ابن قويعان .. لو شاهدوا هذه البنت ...!!!

وقال هذه القصيده ..


يا سبق سيارة راحت بمزيونه = دزيت انا موتري وازريت للحقها
ليت سواقها ماشي على هونه = لو ربع ساعه مع السكه ان رافقها
لو شافها الخس بيح كل مكنونه = وابن قويعان يدبح ما يفارقها
قرواً تشوف الدلال بنظرة اعيونه = مع حلو منطوقها بيضاً عواتقها
بغيت شوفه وحال البعد من دونه = الخط مفتوح والغيره بسايقها
ما حسبت انا موتري يصير به خونه = كن التواير من الشارع ملفقها
رجلي تلحه وكفي في درقسونه = ومكينته دوختني في توندقها
مامن حلا لو يجيب اللي بطبلونه = سبقت ادخينه اليا طارت علايقها
والله لبيعه على ناس يسومونه = واوراقه اللي تشيل اسمي لشققها

ورد الشاعر .. صح بن قويعان .. على الشاعر .. مفرح الظمني .. رحمة الله عليه ..

ويقول فيها ...


يا مفرح العشق له ناسٍ يعرفونه = طرايق اليوم ما تركب طرايقها
اللي هواها على الموتر يعافونه = خلوه للي مع السكه يسابقها
اللي يجاوب حمام الورق بلحونه = اليا شافها تلتفت فاع وتعنقها
لو انها ما اتعرف العقل مجنونه = يقول يا زينها سبحان خالقها
وانت اعلومك عن الزلات مصيونه = مزارعك تنبت العنبر حدايقها
راع الهوى الناس مثلك ما يلومونه = مير البلا اللي عن القبله يشرقها
وانا غسلت الهوى كله بصابونه = نفسي عطيتك يا ابو فيصل حقايقها
من يوم عمري بلغ خمسين مضمونه = بيباني اللي على دربه مغلقها
اللي مقفي تراني ما تبع اضعونه = واللعبه اللي بها منقود ما نطقها
قصيدتي في محمد ليه تنسونه = ورى علومي تجيك ولا تصدقها

ورد الشاعر .. محمد خلف الخس .. على الشاعر .. مفرح الظمني .. رحمة الله عليه ..

ويقول فيها ..


يا مفرح البنت في هرجتك ممنونه = ترغب يا ابو فيصل انك ما تفارقها
بعض العذارى تبيك وفيك مفتونه = كم جادل قبل عاشقتك وعاشقها
يوم انت في زمتك ما تطلب العونه = تهرف كما الذيب واهدافك تحققها
واليوم رجلك عن المرقاب ماهونه = ما هو ردا .. فيك مير الله عايقها
اترك هوى .. اللي تجيك بلطف وليونه = تبا تخسبقك جعل الله يخسبقها
تبا جدد جروح فيك مدفونه = تبعث لهود على الاول تطبقها
احذر من اللي ما هي عاقل ومتكونه = ادناة شي يجيها منك يصفقها
انشد مجرب يعرف الحب واشلونه = والخيل لو ما عدت يدري بسبقها
يوم الهوى قبل ناعم ما به خشونه = جميع لذاته اللي فيه ذايقها
ياما بلشت بمودة كل مكنونه = تشدي لشمس بدت من عند مشرقها
على النقا ما بها حكي يقولونه = مودة يا بو فصيل ما نلصقها


ودمتــــو بحفظ الله ...

الموضوع الأصلي: رديات بين الظمني وصحن بن قويعان والخس || الكاتب: شمس الزناتي || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::