فــلاح الـعـــراك و صـحـن بـن قـويـعــان.. في جميع المملكة ماشي ريـالـه

	السلام عليكم ورحمة الله وبركاتة سالفه وقصيده ( صوتيه . غزل بالبقالة ) , , , فلاح العراك - صحن بن قويعان فيه واحد جاي للمدينه له شغل فيها يبي يخلصه مثل ماتقول مراجعه دوائر حكوميه والاشي من هذا القبيل ويو جاء هارجال وهذا رجال زكرتي والرجال اذا جاء وطب الديره -دائما اللي يجون وهم يعني ضيوف مثلا اللي يجي ما يعرف احد يبي يسكن في فندق لكن اللي يجي ويصير له اقارب ولا يصير له اصحاب عندهم احيانا - من اول حتى الي الان يروح لاقاربه لعيال عمه للي حوله - هذا الرجال جاء الرجال والفى على واحد من اقاربه واللي هو الفى عليه وسكن عنده رجال احواله مستووره وماهوب هاك الغنى مره يعني رجل متواضع الى حدما ضيف اول يوم وهلا به وحط له عزيمه ونادي تاجيران ونادى الاقارب يعني بالواجب اللي عليه ولكن بعد فتره قامو الاصدقاء ياخذونه بالدائره يعزمونه اليوم عند فلان وبكرا عند فلان وهذا بالنهارر وعزايم غدا وفي اللي عشاء ويروح يمين ويسار لكن في وقت الدوام مثلا يروح يرجع وهو ساكن عند الرجال ذا . هذا الرجال اللي هو ساكن عنده بيته يجي تفصاله على هالشكل يعني مثلا البيت بابه الرسمي يفتح جنوب وله من ناحيه النساء يفتح من شرق يفتح والباب الرسمي من الجنوب و اذا دخلنا من الجنوبي اول ما يواجهك على اليمين مجلس وعلى اليسار مقلط سكنه بالمجلس وكانت الامور ميسرره مافيه قاله جيته قال ايه قال شف شنطك خلها هنا وثيابك علقها في هالا وتاد من اول يحطون الناس اوتاد فيهن الثياب واجلس هذا ترى ما عندك احد وشف دوره المياه جنبك جنب المجلس هنا وبعدين عاد ومن الباب اللي وراء دره المياه ومن داخل هذا يخص مالك سنع انت حدك من هالمجلس وهاالمقلط ولا عليك مني نم وارتاح الى الصبح وافطر واذا قمت افطر واللي عليك بالخير واجلس انا بروح شغلي وما للك شغل انت اذا قمت الصبح على راحتك رح رح تراجع للي انت تراجع في بهواك اللمهم اخذ حريتك في هالمجلس وهالمقلط ماعنداحد .واذا بغيت شي ولا حاجه مثلا شاهي والاقهوه طق الباب هذا ويدزونه عليك يجيبونه للك العائله يدفون الطوفريه عليك قال طيب كثر الله خيرك وبيض الله وجهك ولا قصرت فقعد عنده نعاد معلق ثوب عنده جديد معلقه حاطه في وتدين هالحين اذا صار فيه وتد واحد وعلقت عليه بشت من اول الجيت تصلي الجمعه وشفت اللي قدامك بالصف تعرف البشت الي معلق في وتد يصير ظهره وارم كذا واللي مصفط ومحطوط يصير باين لبسه راعيه والي مثلا معلق لكن هذا معلق الثوب والبشت علقهن على وتدين علشان يصير مصبوب وشكله زين - وجالس بها المجلس هالحين له خمسه ايام واسته يروح العزايم ويجي والى الرجال يعتني بمظهره واجد يحب الهندام ويحب مثلا الغترة الزينه واللبس الزين والطيب وهو والله العالم عمره يمكن فوق الاربعين او فوق الخمسين كذا هه دون الخمسين وفوق الاربعين وشكله جميل يعني رجال زكرتي وحبيب ودمث الاخلاق وفي المجلس هاذ الاجاء الصبيح خذ الاوراق والارقام وراح يراجع يمين يسار من سنع اشغال تخصه ولا جا الظهر جاء جاء للبيت وراح هو ويا رفيقه اللي هو راعي البيت للعزايم اللي هم معزومين فيهم وفي الليل مثل ويوم جاء مره من المرات وهم رايحين لعزيمه عشا في الليل والا العشاء اللي هم ماكلينه شوي يوم قام الصبح والاه يحس ان كن كبده مد خنه مهيب مضبوطه والا الساعه يمكن هالحين تسع تقهوه وشاهي يحس الى الان كبده ثقيله شوي راعي البيت طبعا ماهوب عنده في شغله ومعه مفتاح الباب الخارجي اللي برا. قام ولبس هاك الثوب وقال في فكره ابي راوح اصل تابقاله القريبه هذي واخذ منها واما مثلا بارد والابيبسي والاسفن اب والا روب والا بيره اشوف يعني ويش المناسب فلبس هاك الثوب عنده وحط غترته على كتفه والطاقيه فهقها شوي مبين الشعر . هماى اقول لك يجب الهندام وعليه نعال من ذيك النعال النجديه لبسها على ربع رجل يعني باين انه زكرتي و السبحه في يد مثلا حاطها وماشي ويوم طلع من البيت وما صك الباب كامل خلا لسان الكيلون في الحافه عشان ما يقعد يفتح الباب مرة ثانيه ها تسلسل شوي شوي الساعه يمكن تسع ونصف في الحدود الضحي لف يسار ومشى في ها السوق هماى اقول الرجال زكرتي يعني مثلا هو الامر من عند دريشه ناظر لعله يشوف زول والاشي يحب المطالع مر مثلا لقاله عييل صغيرين عند الباب سلم عليهم وحببهم ودارهم واخذاهم كان معه شي هديه عطاهم اياها ويمشي مرمن عند ناس يبنون في بيت عمال والا العمال هذ ولا حطين لهم الماء في ابرميل والا فايض الماء جاء وطق عليهم قال شوفو الماء يطلع برا ياجماعه ولاهم يفطرون قالوا دارين عنه هالحين نبي نجي لمه اتركه احد قال لك حاسب عن الماء المهم انه مجتهد هو مشي شوي الين تعدى ولف السرف يمين ومشى مشرق طالع يدور البقاله شوي والاهذي اليقاله يوم وصلها والا البقاله دكان في بيت يفتح شمال وفتحتين من الشرق والا اللي في البقاله عامل دخل هو مع الباب الشمالي بوم جاء مع الباب الشمالي يشوف الثلاجه بابها قزاز فيها الببسي وفيها البارد كل شي . قال ياولد قال. نعم قال عندك سفن اب قال ايه قال عطنا واحد قال تبي قاروه والاعلبه قال اللي يجي شف البارد راح للثلاجه يبي يجيب له علبه ابطى وتماد شوي هو يوم برق بالبقاله نا ظر بالبقاله والا البقاله فيها عيال لان اليوم اللي هو فيها مثل ماتقول الوقت عطله صيفيه مافيه دراسه وفيه البقاله عييل صغيرين بنات مثل واولاد اعمارهم ست سنين سبع سنين كذا وخمس سنين العييل بالبقاله ذولا مفلين اللي معه توكس واللي معه حلاوه ام عود واللي معه علك شارين من البقاله ذولا بس من اللي جايبهم ؟ هنا الكلام اللي جايبهم بنت جذعه ما دخلت في البقاله هي اللي جايبهم ولا دخلت البقاله لانها تستحي تدخل البنت فاز شبابها شوي يعني جذعه يمكن عمره 12 سنه 13 سنه بس انهاشبابها زين والاهامتكيه على الفريز اللي بين الباريين من شرق فيها فريزرين واحد فيه دجاج وواحد فيه سلع هاللي توكل الضحى ايس كريم ومادري ويش وكاكاو لكنها هي متكله على الثلاجه وهي برا يوم حط رجله بالبقاله ودخل لد نظره يناظر العييل وذلا وشاف وطالع والا البنت . البنت جميله تشلع القلب تهبل جمالها ما يقدر يناظرها اكثر من ثلاث دقايق كنه يطالع لحام ماشاء الله عليها و البنت معها حلاوه معطينها العييل هذولا حلاوه من حلاوه ام عود حلاوه حمرا حطتها في اثمها والا ذراعها زين يعني نظيف ما فيه لا شعر ولا عصب ولا عروق وطالعها والايوم دلي قلبه يرقع الحقيقه التفت وطالعها بوم طالعها هي طمنت نظرها واستحت منه ولفت بوجهها على الشارع يعني هي ماشاء الله رويان جسمها بالحيل قال يا راهي البقاله قال نعم ويش تبي يقول راعي البقاله هذا البارد جبناه للك قال لا بعد ما عندك فقش يعني هويوم شاف البنت ذهل قام وفك البوك وطلع 100 ريال عطاه مثل ماتقول 100 عطنا عطنا ما عندك فقش قال . فقش تقول بارد قال لا ابي اغراض واجد لانه ورد ياقف حتي يشوف عطنا فقس قام جابه له الفقس قال زين قال ماعندك فتايل اتريك والا وين الله المستعان الناس تاركين الاتاريك من زمان قال مافيه قال زين عطنا دفاتر عندك دفتر ابو 20 عطنا دفتر دلا ياخذ اغراض ماله لزوم فبها قال الثلاجه هذه ويش فيها علشان البنت تنهض يدها قال هذي فيها دجاج قال عطنا دجاجه نشب في الدجاجه ويش يبي بالدجاجه وهو ضيف عند ناس المهم اخذ الدجاجه قال اخلص يااخي ابي اروح للناس ابي امشيهم قال لا لا ابي اغراض قال عطني القفل هذا قال هذا القفل اللي اقفل به الدكان ويش تبي به قال ابي اقفل المهم خذ القفل وشرى اغراض ماله بها الزوم ولا رجع عليه راعي البقاله من الميه الا ريالين الحاصل البنت هذي حست ان الرجال ذا مناظره مناظر ذيب امعط و خافت انه يغني اي والله . وحست يوم هذا وقالت للعييل اللي معها يالله يالله ياعيل ويابنات مشينا خلاص وظفتهم ومشت قام عاد هو نشد راعي البقاله هذولا عياله قال ما ادري قال والله الاتدري بس خبيث مخبث قال يا ابن الحلال ويش عليك منهم تدري منهم عياله قال لا يوم لف يناظريبي يشوف وين لفو ويوم اقفوا رجع بها اللي معه وناشب به من ضمنها الدجاجه وين يوديها وهو يمشي جدعها على هالعمال اللي يبنون قال خذوا هذى الدجاجه قال ويش سنعهاقال على حلف اليوم اوزع دجاج قام عطاهم اياه ومشى الين وصل البيت لكن من هاك الساعه اللي هو شاف فيها ذا البنت وهو قلبه يرقع رقع الاشاف شي تخيلها والاشاف ذا والا ذا حتى اللي على كبده خف وراح ما احتاج لها البارد اللي هو شاربه عاد عقب فتره هالقصه والـــســالفه ذي تذكرني بقصيدتين ا حفظهن لا ثنين الشعرراء واحد يرد على واحد وجاري له مثل هالموقف جرى للرجال ذا يمكن راح البقاله وشاف فيها الشي هذا ولهذا يقول على خويه اللي في ديرته اللي جا منها ويقول سـايــقــه لــويــســــري الــظــلمـــه دلــيــلــه عــارف يمــه جــنـــوب مـــن شــــمــــالــــه نــص هـالـلــي عـمــلــه تــبــغـي عــمــيلــه في جـــمــيــع المــمـــلــكــة مــاشي رياله رفيقه صحن ابن قويعان قال ياصــحـــن مـن لــه رفـيـق يشتكــي لـــه والـخــبــر واصـلك في بــطن الــرســالـــه مـل قــلــب فــيــه دقـــات تــشـــيـــلـــه مــثــل دقـــة عــود عــبــدالله فــضــالــه ويش السبب قال مــن ســبـــايــب ورعـــة جــتـــنــي طــويـــلـــه ياصــحــن وافــقــتـــهـــا عند الــــبـــقـــالــــــــه صـــوبـــب قــلـــبـــي ولا بـيــدي حــيــلـــــــــه والــخــطــيـــه عندهــا مــثـــل الـــجـــمــــالــه ان تـبــعــنــاهــا مــع الــشـــارع فــشــيــلــــه وان فـــعــــلــنــا فــــوقـــنـــــا حكم الـعـدالــه كن اللي قايلن هالقصيده يعني له نيه كذا الكن الحاصل وصلت القصيده ارسلها للشاعر صحن بن قويعان طبعان الشاعر فلاح العراك والشاعر الثاني اللي رد عليه صحن بن قويعان . صحن يوم وصلته القصيده طالعها والاه يعرف رفيقه هذا اللي قال القصيده انة رجال كبير ومفروض يصير بعيد يقول ورشوله تروح البقاله وشوله تطالع مايدري ان هذا كان قدامه مواقفه وهي مداعبات طبعا كلهم لرجال عقال ولا لكن رد عليه ذاك وقال مـــرحــبـــا و عـــداد مــــــاتــنــــشـــــي المــخـــيـــلــــه وعــــــد بـــــــراق تــنـــــثــــــــر مـــــن خـــــــيـــــــالـــه يـــــــوم جــــــانـــــي كـــــــســــــاب الــــنــــفـــيـــلـــه كـــنــــي اللـــي شـــــايـــفـــن غــــــالــــي عـــيــالــــه حـــاضــــرلــــرســــالـــتـــه لـــوهـــــي ثـــقــــيــلــــه مــيــــر صـــــارت مـــن فــــضــــل ربـــي ســـهــــالــــه ابــو راجـــح عـــاشــق مـــن غـــيــــر جــــيـــــلـــــــه جــــــاه مـــــن رده عــــلـــى ســــــن الــجـــهــــالــــه يــا فــــلاح الــعـــشــق مــــايـــرحــــم قـــتــــيـــلــــه واجـــد اللــــي فــيــه يـــشـــكــــي مــــا جـــــرى لـــه انــشـــد اللـــي شــــايــــف عـــدلـــــه ومـــيـــلــــــه قــــد عـــرف هـــرج الــصـــحـــيـــح مـــن الــعـــدالــــه وش تــبــي بـالــســـوق يــوم انـــك تــــجــــي لــــه مــن طـــمــــع بــالـــبـــــوق لا يـــــامـــــن نــــكـــالـــه ولا تـــفـــيــــدك فـــزعـــتــــي بــأيــه وســيـــلــــه دام راع الـــمــــال مــــــاأرخــــص حــــــــر مــــــالــــه لا تــــكـــاثـــر مــن خـــطــا شـــقــــراء جــــديــــله قـــبــــلـك الــــهــــزان وقـــتـــه مـــا صـــفـتـــى لــــه حـــــولــــــنـــه بالــــركــــيــــه طــ ــول لـــيـــلــه وكــــل فـــرض قــــام يــــطـــلـــع مـــــع حـــبــــالــــه الـــهــوى بـــلــــشــاتـــه أكـــثـــر من قــبــيــلــه مـن ضــــرب ســــوق الـــهـــوى يــبــلـــش بــــحــالــه الـــهـــوى لــي وقــــت أنـــا داعـــي ســبيــلـــه مــعــطـــي الـــمـــطـــنــوخ مــنــي لـــه حـــــــوالــــه وأحـــمــد الله يـــوم جــــا الــهـاتــف حـصـيــلــه قـــــد طـــويــــت ارشــــاي وادرجـــــت المــــحــــالـــه وسلامتكم وار جو ان القصيدتين المرسلـه والرد تنال اعجابكم . وسلام اختام

الموضوع الأصلي: فــلاح الـعـــراك و صـحـن بـن قـويـعــان.. في جميع المملكة ماشي ريـالـه || الكاتب: محمد بن حلبيد || المصدر: منتدى الجبلان الرسمي

www.aljblan.net

المصدر: ::منتدى الجبلان الرسمي::