لا عاد تزهم أبطوي صفحة الماضي
خلاص ببعد عسالله يكتب الخيره
مادمت راضي فـ بعدي والهوى راضي
وش دخل القوم بالغصن وعصافيره
ماعدت تلزم لو انك ضمن الاغراضي
برميك وارمي معك كسري وتجبيره
ما طحت لوّي دفينه بين الانقاضي
ياناقل الهرج لا تستصغر السيره
من لا حشمني حشى وان كانه القاضي
لا علمه درس ما ينسى تفاسيره
وش عاد لاقفيت عني وانت مغتاضي
لانت ابولد عمي ولا بيننا جيره
بارق وفاك الوكاد اليوم ما ناضي
والهجر حدّر علي وابل شخاتيره
هذا قراري وهذي جملة اعراضي
يوم الزمن ما نشدنا في مقاديره
صبر الزمن في عطاه اليوم قد فاضي
والوقت عزّم على غبنه وتحقيره
دام الغبن ياعيوني ورّث امراضي
وش حجة اللي تجنّي في معاذيره
|