ياحزام لاتبكي على فايتن فات = الوقت راح ومامضى مايعودي
لو كان هليت الدموع الحزينات = ماهو براجع ياعريب الجدودي
اللي تبا دونه اسنين طويلات = اقفوا هله ماباقي الا العدودي
لاشفتها ياحزام هليت عبرات = وانتى من اول يالسنافي جحودي
اثرك مع الصمان روحين في ذات = واثر الغلا حدر الضلوع معقودي
تبكي ليا وا يقت فوق المنيفات = بين الصفي ومحقبه والنفودي
يطري على بالك اسباعن مجيعات = قفتبهم دنيا الفنا باللحودي
اهل البيوت الشامخات الرفيعات = سودن مشاهدها يداو الكبودي
اللي تذريها البنات العفيفات = بنات عودن مير ماهو بعودي
والفجر ماتسمع يكود المنادات = والبيت يرفع مقدمه بالعمودي
وتفاوقت مع طلعت الشمس خلفات = وكلن على مدات خيره يجودي
اهل الفخر واهل العلوم الجزيلات = اللي مع البيدا سوات الفهودي
يرعون شقحن مكرماتن مقيمات = ومظهورهم مع كل فجن يقودي
يرعونها بسيوف هندن رهيفات = وشلفا مضاربها يقص العضودي
راحوا وخلوها على غير مشهات = وتبدلت بيض الليالي بسودي
واللي بقا بين البلد والحضارات = ماعد ياصل لو تبا للحدودي
وانت على علوى تذب الطويلات = وتقول وين مجودين العهودي
باقي ارسوم بيوتهم والعلامات = تقدح بقلبك مثل قدح الزنودي
بين الضماير والضلوع النحيفات = وتقول وقتن راح ليته يعودي
ـــــــــــــــــــــــــ
صح السان / نايف ابوطفره
حي والله هالراس يابن لامي على طيب النقل