عبدالله البكر معنا بالمنتـدى
هو الشاعر / عبدالله البكر التميمي لا اريد اتحدث كثير عن هذا الشاعر ولكن !!!
عبدالله البــــــــــــكـــــــر هـــــــنـــــــا وهـــو يتحـــدث عن نفـــســــه !!!
أرض الأحلام و أشجار الأماني يباس
........................... و إنت ظالم .. ولكني أحبك كثير !
واضح إني خسرتك للأبد و إنت حاس
........................... خلك أقوى شوي و إعترف بالمصير
رحت .. يوم إرتوت فيني عذوق الحماس !!
........................... مثل من ياخذ اللقمة من أفم الفقير
عندي إحساس وشوية رجاوي .. و ياس
........................... وما بغيت أزعجك مدام وقتك قصير
قلت أبنساك يمكن هالمسافة تقاس
........................... بين ذاك الزمان اللي مضى .. والأخير
صاحبي مارضيت أنساك من قو باس
........................... يوم أبنساك .. كنت أبغى يموت الضمير
الغرابيل تلحقني وأنا ( بدون ناس )
........................... عفت ناسي .. عشان أبقى بعينك كبير
يوم كان الوفا تحت الخديعة يداس
........................... والغرام آخر حلول الوسط للعشير
كنت غالي وكان الناس حولك نحاس
........................... كنت صادق وكان الكل حولي يغير
ليت الأيام ثلجه ذابت بوسط كاس
........................... كان عودت مع برد العلاقة صغير
كنت أنا و إنت في ذيك المحلات ماس
........................... و إسرقتك الحياة الهادية وصرت غير
بس كانك تبي فرقى مثل منت حاس
........................... خل ( ليل الخبر ) يذكر همومي بخير
ليت نار المحبـة .. بالمحانـي تشـب
دام حزني نسيـم .. وذكرياتـي جمـر
وليت كل الخلايق لا تمـادت .. تحـب
كان شفت المساء ساجد سجود الشكـر
وليت نور المدينـة مـا درى وإكتـأب
وما طفى .. يوم قرب موعدك يالسفـر
كن الأيـام طفلـة .. تستحـق العتـب
تركض ولا درت باللـي وقـف منقهـر
غابت من السماء شمس .. وبدا ينكتب
عالصدر .. وش كثر حبيتها .. وش كثر
داخل القلب بنـت ٍ .. غارقـة بـالأدب
ما تساوت مـع باقـي بنـات البشـر
طيبـة .. ماتعـرف إن المحبـة تعـب
ناعمة .. ما تعرف إن الغصن ينكسـر
تلمس الأرض .. تتحول مناجـم ذهـب
تدعي الغيم .. يحضر في يديهـا البحـر
تبتسم .. تضحـك الدنيـا بليـا سبـب
كنهـا مابغـت تلقـى وسيعـة صـدر
غيـرت طعـم هالدنيـا بطعـم العنـب
صار كل الكلام اللـي تقولـه .. عِبـر
كل الأسماء .. وكل ما سمّي و ما إنكتب
زخرفه .. لإسمها الجالس بعرش السطر
كنت أحبه وأحب الماء وأحـب السحـب
وصرت احبه وأحب إسمه وأحب السهر
لي متى ..والزمن قاسي وطبعه صعـب
لي متى .. والفراق أردى رفيق ٍ حضـر
لي متى .. أنتظر ريـح التلاقـي تهـب
وتنقشع غيمة الغيبة .. وبـرد السفـر
وإنتهينا ,
والزمن يضحك علينا ..
لا بكينا !
والوداع اللي دريت إنه نصيبي ..
يا حبيبي ..
مو بيدينا !
ما علينا ..
أدري ظروفك قويّة يا حبيبي ..
يا حبيبي ..
يا حبيبي ..
وأكثر اللي بأفقده كلمة " حبيبي " .
كانت شفاهك ..
تهاجاها علي .. كنّها قصيدة !
مب جديدة ..
بس ما مرت علينا !
كل أمانينا ..
وأحلام الحبايب !
طيرتها الريح ..
طالبك .. ما تصيح !!
دامنا ..
صدق إنتهينا ,
والزمن يركض وهو يضحك علينا ..
لا بكينا !!
صرت قاسي ..
صرت أصب أحلامي الحلوة بكاسي .
وأكسره !
صرت أخاف أتذكره ..
وقبل ميلاد الظروف اللي احصلت لك ..
بعت ناسي !!
صرت مثلك ..
صرت قاسي !
ماأحس ..
برقة القمرى وهي تضوي جبينك ..
أو احس ..
برقة القمرى .. ولا أدري إنت وينك !!
يا حبيبي ..
ظنك الدنيا تنسينا بعضنا ؟!
لك معي بأكثر تفاصيلي .. ملامح ..
إمسح أبياتي من الدنيا ..
وأنا والله مسامح !!
من زمان اتخيل إحساسي وانا أودعك راحل ..
للحنين !
لآخر حدود المدينة والسواحل ..
للسنين !
اللي مثل جسمي وأنا ناحل ..
حبيبي ..
يا حبيبي ..
يا حبيبي ..
يا أعز إنسان يطعني وأنا راضي عليه ..
يا أحن أحضان ضمنتني وأنا غارق بعيبي .. قول ليه !
ليه أحس إنك تحاول من زمان ..
وآخر أيامك قدرت !
لين بان ..
نظرة الواقع بعينك ..
صورتي وآنا أدور عنك وينك ..
قللي بس .. وش صار فينا !
وين كل وعودنا ؟
وين آثار البكى بخدودنا ؟
وين حلفك لي :
إذا طاري على الهجران طاري ..
ما تصد !!
تشرح أعذارك ..
وأنا والله مسامح !!
ما علينا ..
يمكن العشق القديم يظل فينا !
أو يموت إليا بكينا ؟!
المهم ..
إنـّـا إنتهينا ..
والزمن يضحك على باقي حكينا ..
والوداع اللي دريت انه نصيبي !
يا حبيبي ..
يا حبيبي ..
مو بيدينا !
المسافة وضيق الوقت .. وأشواقنا !
.................... والكلام .. ووجيه المقبلين السمر
والسؤال الوحيد اللي من أعماقنا ..
.................... ودي أسأله قبل إن الدقايق تمر
القدر أو ظروفك .. أيهم عاقنا ؟!
.................... قللي إن كان باقي لي بعذقك تمر
حسبي الله على اللي سبب فراقنا
.................... ما رحم وقفة الذل وعيوني الحمر
كل ساعة تعدي تخنق أعناقنا ..
.................... كن حروفي حفاة وأرض وقتي جمر
تدري اليوم .. جالس احسب أوراقنا !
.................... من يصدق تفارقنا بعد هالعمر !!
تذكر آخر لقاء والدمع .. وعناقنا
.................... كيف كان المكان بشوقنا منغمر
خايف إن الزمان اللي قبل ساقنا
.................... للجفا .. يعجبه ما صار ثم يستمر
وإنت روحي وأنا من ليلة فراقنا !
.................... أنتظر في مكاني كل ليلة تمر
ليت المحبـــة ( كــــــــاس ) !
وأقوى على كسره ..
وليت الكـــلام ( إحســـاس ) !
ماهو كذا حســـــــرة ..
يمكن بقى فينــا ..
نـقـشــة اســامينـــا .. وسط الغصن الأبكم ..
لكن !!
كل الطـــرق عســرة ..
غابت سماء زرقا .. وشمس .. وهبايب
...............................ولا بقى لي غير .. ليل وبعض هَـمّ . !
يسألني العالـم عـن إنسـان غايـب
.............................وعجزت من حزني عليـه .. آتكلـم !
إن كان باقـي لـي دعـاء وطلايـب
............................فالله .. يعيد شفاهـي اللـي تِبسّـم ..
مريت بـدروب ٍ قديمـة .. عجايـب ؟
.......................حتى المكـان اللـي تركتـه .. تألّـم !
بيـت ٍ قديـم وبـاب مبلـي وذايــب
.........................وجدار .. من خـوف الملامـة تهـدّم
وماضي وعشـق وذكريـات وحبايـب
.......................وكلمات .. مكتوبة على غصن أبكَـم !
بس التـراب اللـي وفـا .. للخرايـب
..........................وغطا شوارعها .. لأجل يحجـب الغَـم
كن داخلي طفل ٍ لـه إحسـاس شايـب
................................وإتركتـه الدنيـا .. إلـيـن إيتعـلّـم
وكن الشجر .. رجل ٍ يعـرف السبايـب
.........................ومات .. وترك كل الحيـاة .. إتنـدّم !!
دام العشق خايب .. والإحساس خايـب
............................و ش لي .. أمر بصوب بيته وأسلـم ؟!
ذكرنـي ( ترابـه ) بإنسـان غـايـب
...........................وعجزت .. من حزني عليـه آتكلـم !!
أحيان أحس إني وسط خافقك ذبت !
..................... وأحيان أجي بالبال لاصرت فاضي
يا صاحبي ليه أكره الناس لاغبت
..................... وأقول خذ قلبي معك .. منت راضي
كم ضاقت الدنيا علي وتعذبت
..................... وكم جيت لك قاضي وعوّدت قاضي
لا إنت الذي قدرت حالي وقربت
..................... ولاإنت الذي خليتني لإفتراضي
داخل عليك إن شفتني ليلة السبت
..................... خلك عن الوجه العبوس امتغاضي
ولاتسأل شلوني .. تراني تقلبت
..................... حتى بياض الوجه ماهو بياضي
لاتلومني .. كم شفت ناس وتغربت
..................... وكم دست بإحساسي ديار وأراضي
وإن كان حسيت إنك بوصلك أذنبت
..................... فالله .. ولا حب ٍ شقوقه عراضي
ولو أسألوك أهل الشماته .. وجاوبت
..................... قل : سيرته مايسمعه غير واضي
بآغيب أحبك وأذكرك .. وإنت لاغبت
..................... غيب بسلامة رب العباد راضي
وش بي تخيلت السماء .. رجل ٍ سمعني يوم بحت !
.......................... بإن الغيوم " أطفال " .. نفرح لا تغشاها العرق
يشغلني الهاجس .. وإذا زاد التعب بي إسترحت
......................... ودي لذيذ النوم لا حس بغرابيلي .. يـرق !
أنا حزين ؟ .. أو إني أتضايق إلا مني سرحــت ..
......................... آصك بابي .. وأشغل البال بـ سواليف الورق ..
كنت أكتب شكثر البكى هاين علي من يوم رحت !
......................... و من التعب .. نامت أحاسيس وصحاها الأرق !
جالس أعد بآخر الأيام .. كم مره إنجرحت !!
......................... وإذا عرفت أسأل ثمين الوقت .. كم منه إنسرق !
وأضحك أبي كل البشر تدري .. وإذا صديت صحت
......................... ما ودي العذال تشمت بي وأنا ميت غرق !
وأنا وقفت لضيقة الفرقا .. وضاقت بي وطحت ..
......................... إلين قلت بصوتك المبحوح " مابي نفترق " !
حبيبي إن كان الفرح صادق .. فأنا والله فرحت ..
......................... كنك رجعت تعلم الأيام .. ويــش اللي فرق ..
أمس أكتب أحزاني من الحسرة ولا مره مسحت ..
......................... واليوم أشب بدفتر الذكرى .. وأشوفه يحترق
الليلة البدر يحكي لك .. كيف بالهم إنذبحت !
......................... كني سجين ٍ .. كل ما يحكي عن عياله .. شرق !
الليله تعرف شكثر تطري علي من يوم رحت !
.......................... وتشوف كيف إنه شغل بالي سواليف الورق ..
من وثق بالهبايب .. يطلق الطيـر
الفضاء .. ياسع الطرقي وطيـره
ما يزيد الحمول .. إلا المشاويـر
يا عسى سكة الغالـي قصيـرة !
ضاق صدري عليه بحزة عصيـر
قلت يا الله عسى بالأمـر خيـرة
من سمـع للنسايـم والعصافيـر
ذاق طعم الحيـاة ومـات غيـرة
كن نبض الخفوق إبـل ٍ مغاتيـر
هيجن البـال و تسـاوى مسيـره
ضاع كل الكلام ومـا بقـى غيـر
مقطع ٍ من " قصايدنا الأخيـرة "
كان عنـدي سواليـف ومعاذيـر
خفت أسولف ..و يسمعني هجيره !
لو يهـز المحانـي يبشـر بخيـر
بإتساقـط مشـاريـه ٍ كثـيـرة
ليت عيني تخـف مـن التعابيـر
دام دمعي عجـز يحيـي ضميـره
وإن نسى إني أحبه خير يـا طيـر
مات قلب وحيـا عشريـن غيـره
قد نشف ريقي البارح وأنا أسيـر
وإدعى بالعطـش والمـاء ببيـره
ياهبوب الشمـال أحلامـي تطيـر
وإنتي اللي نقـل ريحـة عبيـره
ما نبت في وسط صدري نواويـر
لأجل أبـوح بسواليـف السريـرة
رفقة الهـم رفقـة نافـخ الكيـر
لا حضر ذاقت ضلوعـي سعيـره
لا تخيلت بكره وش يبـي يصيـر
قلت ربي عسـى يعطيـه خيـره
جاء لقلبي وهو شيـخ الغناديـر
وغاب عني وهو عيني البصيـرة
البقى بـراس الأوراق المساهيـر
والبكى ما تـرك للشعـر سيـره
ما كتبت القصايد يومـي صغيـر
مدخرهـا .. للأيـام العسيـرة !!
وقت ما ألقى مكاني وأطلق الطيـر
والفضاء ياسع الشاعـر وطيـره
تكتب الريح إسمي .. وسط كف السحـاب
كنها تقول : شوف .. إنك وصلت الجدي !
تدري إن أناظر فـوق .. وقـت الغيـاب
قالت : أحسن أنسيه الحـزن .. ويغـدي
حسّت الريح فيني .. من كبر هالعـذاب !
وأنت ماتدري حتى إن لك رفيق أجـودي !
ليه أحس إن لك بوقت الفرح ألف بـاب ..
وكل ماجيـت بـاب أتعـب أفـك بيـدي
طحت من طولي .. ومار حان وقت الذهاب
أنتظر منـك ( يَـد ) .. تجرنـي لسعـدي
طوّل الوقت .. لين إن أصغر إحساس شاب
وأنت تدري .. ومع هـذا رحلـت تعـدي
كانت الناس تنصحنـي .. وتبـدا العتـاب
وكنت أسج وأفكر .. كيـف معـك أبتـدي
لين رحت .. وانا في فمّـي الصـوت ذاب
وصار كل شـي إيتذكـر غلاتـك .. ردي
لو تخاف البراري .. مـن قـدوم الذيـاب
كان خاف الصدر .. يوم ٍ لمست جسـدي
ولو تعرف النفوس الطاهرة .. بالصـواب
كان عيّت أواصـل .. وإفرشـت مرقـدي
وكان كلمة ( أحبك ) فتّقت جـرح طـاب
يا كثر ما إنفتق من جرح لي .. يابعـدي
ناظر الريح .. خطـت قصتـي بالسحـاب
كنها تقول : صدق إنـك رفيـق أجـودي
ما نسيتك !
لو أحس إني نسيتك ..
مانسيتك !
لو أموت من القهر ألفين مره ..
مانسيتك ..
لو نسيت الناس والدنيا ونفسي ..
مانسيتك ..
يا ليل .. وش حببك فينـي ؟
لايغـرك انـي معـك هـادي
مابـان لـك رعشـة يدينـي
ولا شفت وش بالصدر غـادي
وإن كان شد نظـرك عينـي ؟
ومسابـق الـدمـع لـلـوادي
لا تخاف .. هذا قضـى دينـي
للملح .. يوم أونـس فـوادي
أيـام مـا كـانـت سنيـنـي
تضحك علـى كثـرة عنـادي
كنت أحسـب الغيـم يبكينـي
وكل ما إنكسر خاطري .. زادي
وكنت أحسب النـاس تغلينـي
وتحس .. في كثـرة سهـادي
وكنت أحسبك .. ماأنت ناسيني
ياليل .. لا عافنـي .. رقـادي
أمسي .. وبالظهـر سكينـي
وأصبح وأنا جروحي جـدادي
ما أقوى على شيـل رجلينـي
والناس .. تركض علـى زادي
والصاحب اللـي .. يواسينـي
صار أول .. ثيـاب الحـدادي
كنـا علـى الـدرب ماشينـي
ومادري من اللي بدى ينـادي !
لدْ .. وحسبتـه .. يحاكينـي
وأثره يقـول : الجفـا بـادي
لـي صـوت أظنـه ينادينـي
وانت أبخص النـاس ببعـادي
ومن ذيـك الأيـام .. يكفينـي
أحـزن علـى يـوم ميـلادي
حتـى الـسـواد بشرايـنـي
والله حسيـت بـه .. عـادي
والحين وش حببـك فينـي ؟
مابان لك .. ليه انـا هـادي ؟
أدري إنك :
ما تمنيت .. الصدّف ..
لكن الحظ الردي ..
من يمنعه ؟
تطيح من السماء حزمة خيوط تكسر الديجـور
ويجمعهـا الفجـر ويخيـط منهـا أول ثيابـه
وتبدا ضحكة الأرض إتجلى في ثغـر عصفـور
نفض عنه غبار الأمس وأكمل مـا تعنـا بـه
وتطرق نسمة الصبح البهي شباكي المكسـور
تبي تبدا طقوس من الكـلام بجـو يتشابـه !
تحسب إن الجميع إن قابله بيقابلـه مسـرور
ولا تدري عن اللي خافـي ٍ بالقلـب وأسبابـه
على العادة حبيس بغرفتـي أرتـب المستـور
وفرشي ما وعيت الا بوقع أقدام تاطـى بـه ..
أثاريه الفجر يسبر مكـان ٍ مظلـم ٍ مهجـور
بوقت إن السواد أخفى ملامـح زخرفـة بابـه
يلامس ركني الغايب عن الوعي لثلاث شهـور
يريد يفتش أدراج الزمـان ويعـرف مصابـه
بغيت أخبره بـإن الوسـاوس تستحـل الـدور
ونسمات الهواء راحت تسد الديـن لأصحابـه
هناك هناك في صحراء المواجع طبق الدستور
على قلب إنجرح وأطلق سراح العين واهدابـه
حسافة يالصحيح اللي بدا يشفق عليـك النـور
رهنت إسمك لأجل تكفي الغرام بكامل حسابـه
وردت من الغضب لين استباحك والسبب مغرور
فلت حبل الوصـال وكسـر المجـداف بغيابـه
تذكر .. كم تحملت الثقـال الموجعـة مجبـور
عشان العشق ورياح الغرام اللـي تهـزا بـه
يقولون الأسى يوم ايتسلـل للـورق معـذور
لقى حبر العمر مقدي بنفـخ الكيـر وأطيابـه
تلفت لي وفي كفه رسايل من زمـان الجـور
تبيح من الكنين اللي يهـز القلـب وأطنابـه !
رسالة من سطر واحد عليها من التعجب سور
تعبر عن مدى كـره القلـم لمـوادع أحبابـه
تذكرنـي إذا تـاه البيـاض بزحمـة الديجـور
تذكرني .. إذا شفت النهـار انشقـت ثيابـه !
ودي أقول حكايـة النـاس والبيـر
وكيف إتعبوا .. لأجل إيتهنون بالمي
وودي أشبهها بنفسي وأنـا آغيـر
وأفهمك .. كيف السحب تقتل الضـي
( ودي ) .. وخايف يسمعن العصافير
وتقوم .. وتصحي معاها هل الحـي
نم يا قمر دنياي .. تصبح على خير
خل النهار يحس بإنـه بقـى حـي
كل يوم أحبك غير .. والبارحة غيـر
بديت أحس إن الخلايـق ولا شـي !
إفرح .. إذا طالت علينـا المشاويـر
يمكن يزيد الشوق في داخلي شـوي
مدام حبـك .. قسمتـي بالمقاديـر
بأصبر .. وكن حر القوايل معك فـي
والله .. أحس ان لي جناحين وآطير
لامن ذكرت .. إنك ذخرت الغلا .. لي
خلك وسط قلبي .. لو يصير مايصير
كل الخلايق في وجودك .. ولا شي ..
تخطي وأقول .. إن أنا المخطي ولا أتشرّه !
وتخطي بعد .. وأعذرك وآقـول مايـدري
وفي كل طاري .. يمر تخطي كـذا مـرّه !
وأخاف حملي يزيد .. وينكسـر ظهـري !
جايز .. اكون الحليم اللـي ظهـر شـرّه
وجايز يكون الغلط منـي .. وذا عـذري .
يا صاحبـي كنـت أحبـك حيـل بالمـره
ولازلت أحبـك .. ولكـن العتـب يطـري
أحيان أشوفك " بعيـد وخايـف آضـره "
وأحيان أشوفك قريب .. إرتاح في صدري
ليه أسألك عن جروح القلـب .. والحـرّه
وانت أبخص الناس في جرحي وفي حـري
يا صاحبي .. لو مسك كل ٍ علـى سـرّه !
ما كان الأحباب .. سموا حبهم " عذري "
وأنا تعبـت أسحـب الأحـزان .. وآجـره
وأحفر بأثر جرتي .. قبـر يغـدي قبـري
إما تكـون الحبيـب اللـي قـرب مـرّه
ولا عسـى الله يقدرنـي علـى صبـري
وأنـا أحبـك .. ولا بـآعـاود الـكـرّه
حتى ولـو كبريائـك .. صـار يستجـري
مإخترتـك تـذوق حلـو بكـاي أو مـرّه
إخترتك .. تحس بأحلى شي فـي عمـري
فـلا تكابـر .. وأنـا ماعـاد بأتشـره !
وإنت وضميرك .. وفكر قبـل لا تسـري
|
|
تعليقاتكم البناءه هي طريقنا لتقديم خدمات افضل فلا تبخل علينا بتعليق |
|
|
جا يشوف الحال كيفـه بعـد ماهـزه حنينـه
قبل يسألني سألته:كيف حالك يالحبيب ؟
قال انا كنـي غريـب مضيٌـع دروب المدينـه
قلت انـا كنـي مدينـه تنتظـر رجعـة غريـب !
|