أسبوع مرّ !! ولاوصل منك مرسـال=ياقوّ قلبك كيف تقطعنـي أسبـوع ؟!
الجوع كافر ! وانت ماترحـم الحـال=وانا عليك من الولـه ميـت ٍ جـوع
ياللي غيابك صعب يطري على البـال=تركتنـي ضايـق وحايـر ومفجـوع
ماكنّـي الا: شايـب ٍ فاقـد عـيـال=وماكنك الا: محرم ٍ حق مشـروع !!
يفوع لك قلبـي ليـا مـر الاطـلال=ياليت مالـي قلـب يشتـاق ويفـوع
حسبي عليك شلـون قطعـت الامـال=بآآآموت لاصار الامل فيـك مقطـوع
ياصاحبـي ماكـل نـزّال رحّــال=انت الحيّا من وين مارحت متبـوع !!
نسيانـي لـزول ٍ بالاعمـاق يختـال=اصعب على صاحبك من حبة الكـوع
لو الثمن في شوفتـك عمـر رجـال=كان الثمن من يوم ماغبت مدفـوع !!
ولو القدر مـا تـم قولـه ليـا قـال=ماضاق صدر ولا انحنى راس مرفوع
ياصاحبي عشقتنـي فعـل وخصـال=وانا عشقتك شعر واحساس وطبـوع
وشلون تتركني كذا لا اشهـب الـلال=وقدّام عيني تجف ينبوع .. ينبـوع !!
وانا عشانـك جيـت والغيـم همّـال=اسيّـل الوديـان واداحـم جـمـوع
ماردّنـي عنـك سواليـف عــذال=تزعل عليّ ربوع وتقـدّر ربـوع !!
كان المهم اعيشـك جنـون ووصـال=ويكون لي كلمه ولـي راي مسمـوع
واليوم ضاقت بي من الجـال للجـال=فرقاك تقصم ظهـر وتحـز وتلـوع
لو جيت شفت الحال ماسرّك الحـال=في غيبتك ضايق وحايـر ومفجـوع
هذا غياب اسبوع وشلون لـو طـال=طالبك .. لايطوّل غيابك عن اسبوع !!
= مــحمـد جــارالله الـــسهلي

الموضوع الأصلي: (( أســبـــــوع )) || الكاتب: مـشـبـع الـطـيـر || المصدر: منتدى الجبلان الرسمي

المصدر: ::منتدى الجبلان الرسمي::