::منتدى الجبلان الرسمي:: - عرض مشاركة واحدة

03-09-2008, 10:27 AM

ثلاثيني تعدّت والهقاوي خانها التعبير
انّوخ هقوتي تاره ... وأشد ركابها تاره
انوّخها واشّد ركابها .. وبعير بأثر بعير
واشوف الوقت يطحنّي رحاه بجاير اقداره
.
.
.
ليا اشتّد الهجير نقول .. هين تاليته عصير
رجال ٍ ما جزعنا من عجاج الوقت وغباره
وعزّ نفوسنا كنه يقول .. اللي يصير يصير
على العزّه مفاطيم .. وعلى الأقدار صبّاره
تكون بفمك تمره .. والنصيب يسوقها .. للغير
كذا .. طبع الزمان اقشر .. كذا .. الأيام دواره
زمان ٍ عقّب النشمي على المركى بنافخ كير
وتشوف اللي يبيعون الدجاج اليوم صقاره
وانا .. رجل ٍ لمح برق ٍ .. فهلّل واكثر التكبير
وصلّى عالرسول احمد .. نبي الله ومختاره
جهره النوض واستبشر يباسه بالمطر والخير
بذاك الصيف .. واثر اكثر.. بروق الصيف غدّاره
لقى ثروة شبابه بأيد حظًّ يعشق التبذير
رمى باحلى سنينه للهموم وكثرة اسفاره
غرس نخل الصفاري بأرض ناس ٍ يزرعون شعير
وفي جني الرطب عيّوا عليه يجنّي ثماره
وانا مانيب من يسكت على ضيم الغبينه مير
اشوف ان الحصاني هالزمان تناطح نماره
يقولون العرب .. خلّ التعجّل واحسن التفكير
وانا راسي لعب فيه الصداع وشتت افكاره
ولو هدّتك ياقلبي سنين الهم والتعزير
تحمّل .. لاتكدّر .. سدّ مآرب هدّته ... فاره
بسيطه ياذنوبي لو تخونك شرهة التكفير
عسى ضيم السنين اللي مضت بالعمر كفاره
ثلاثيني تعدت ... حلم .. ماحصّلت له تفسير
انّوخ هقوتي تاره ... وأشد ركابها تاره