بسم الله الرحمن الرحيم

هذي مجموعة كبيرة من قصائد الشاعرة المعروفة " عابـــرة سبيــــل " الله يرحمها ويسكنها الفردوس الأعلى امين يارب العالمين.....

وأتمنى ان تنال إعجابكم ....... وأنا من المعجبين جداً بالشاعرة المغفور لها باذن الله
عابرة سبيل


==================
ليته درى صبحية العيد وش صار
ياهي جرت لي من عذابي هوايل
يوم العذارى بيحن كل الاسرار
وجت السوالف بين قيل وقايل
هذي معايدها قبل وقت الاسحار
وهذيك صاحبها عطاها رسايل
وهذي تقول انه لفى البيت زوار
وهذيك راحت له زيارة عوايل
وهي تفاخر في غلا الصاحب البار
تقول عايدها بكل الوسايل
وانا اطالع فوق ويمين ويسار
بالعيد حتى مامشطت الجدايل


================


ضايقه بالحيل محتاجه اشتكي
لولا هم بي يمديني شكيت
بس ادور عذر من شان البكي
لو يدوسون بطرف ثوبي بكيت
كلما جيت اتريح واتكي
يزدحم في خاطري الفين بيت
اعجلي يانفس موتي واخلصي
صرتي همي يوم في الدنياشقيت


================



ياكثر شعر كتبته امس والبارح
وياكثر شعر عقب فرقاه سجلته
دفاتري امتلت من سبة الجارح
ها وغير الذي للحين ماقلته

=======================

لاترفع الصوت ماني فيك مجبوره
قررت دربي وصوتك مايوقفني
ارضى انا بقاسيه وارضى بمغروره
وماارضى بعشرة حبيب ماتشرفني


==========

مقدار حبي عالم في ربي
والا الموازين لغرامي ظلومه
لالاتقارن حب امك بحبي
اخاف من عينك تطيح الامومه

===============


قال الرسايل وينها قلت ذيه
وللريح عرضت الرسايل والاوراق
ورزيت نفسي واتظاهر قويه
يعني كاني ماتاثرت بفراق
هذاك لاقال الشتاء صيف عرقت
ولاقال صيفي برد شبيت ناري
هذاك لاقال الجمل طير صدقت
واقول ريشه بعثرته الصحاري

==================

حان الوداع وتم توديع غالين
قسوة زمن وظروف ماهي رحومه
واقول وش تنطر حبيبي لها الحين
اثر يديني ماسكات كمومه

============

قال الوداع وقلت له بالسلامه
هي ظروفي دايما جابراتي
قفى يداري عضة في بهامه
وقفيت اداري عضة في شفاتي
وكل رحل يحمل بقايا غرامه
وراحت حياته عقب راحت حياتي
فرقاه ضامتني وفرقاي ضامه
وعلى الله الوالي خلف ذكرياتي
وعقب البطا ارسل عليا سلامه
يرجيني يطلبني يبي تضحياتي
مااقدر اضحي بالشرف والملامه
وامومتي ترفض ايتم بناتي
وان ماحصل لقياك يوم القيامه
مااظن تحصل شوفتي ياغناتي

==========

لاوداعيه ولاهم يحزنزن
قط لي كل الرسايل وانصرف
رافض حتى وداع التيلفون
قام يكرر ماتخبيه انكشف
ماجداي الا اناظر بالعيون
لين زوله عن مدى العين انحرف
كيف خان وهو حالف مايخون
وين عهده وين كلمات الشرف
كل شيء عقب محبوبي يهون
واستوى عندي مماتي والترف

===================

معنى الحياة بعينها صحوة الموت
شهود صلوا والمملك دفنها
وكوشة فرحها حولوها لتابوت
واكليلها الابيض بقايا كفنها
تبريكهم اصبح عزا يجرح الروح
صرخه ويبابه تساوى لحنها
راحت معه وبقلبها حرف منحوت
يبقى معاها لين يطوى بدنها
راحت و..... القهر لاتها لوت
لا ابو تقاليد الحياة وسننها



==================

يمه يايمه فديتك لاتخليني
بعثرني الهم وابغي يديك تجمعني
يمه افهميني تراك ان مافهمتيني
مافيه شخص في هالدنيا بيفهمني
ماعدت انا طفلتك كبرت شوفيني
خليك يمي ترا الاطماع تتبعني
لاتدلليني ابي منك تدليني
وابي يدينك تداعبني وتصفعني
ولاانهد حيلي ابي عطفك يقويني
ياما كلامك على الشدات شجعني
وان جيتك ابكي ابي منك تهديني
ماابيك تبكين ابغى العقل ينفعني
يامملكة عطف ياعطر الرياحيني
براثن الهم والهوجاس تطعني
بسمتك عندي الا من ضقت تكفيني
ورضاك عني عن الاحزان يرفعني
اسمى العلاقات تربط بينك وبيني
ياللي احضانك لاضاق الكون تاسعني
لك احترامي وحبي والوفا فيني
وفيك اروع الحب مايخطي ويخدعني


=================

تعال بشـرح لـك أنـا كـل مغلـوق
تعـال شاهـدنـي مــع ذكريـاتـي
لا لا يغرك لبس موضـة ومسحـوق
انفض غبـار الوقـت تلقـي صفاتـي
قرب وطالع معّـن الشـوف بحـدوق
وزيف التطـور جـرده مـن حياتـي
بتشوف في وجهي من الماضي اطروق
أخذت من بطن الصحـاري صفاتـي
طفلـة بثـوب مخيطينـه ومفـتـوق
تنطـر جديـد الثـوب بالعيـد ياتـي
سمعت طرف اخبار عن كلمة السـوق
وتاخذ وتسـأل هـو وجـوده ثباتـي
طفلـه سحبهـا الوقـت للهم برفـوق
حتي انهـا صـارت مـن العاشقاتـي
وجار الزمن وعرض الحـب للعـوق شـرق
ركايبهـا وهــم مشمـلاتـي
واتلا عهدها فيـه يركـض ورا نـوق
مسرود جيب وفـي يدينـه عصاتـي
ويصد لكن يلتفـت لـي مـن الشـوق
عجـلان يلخصنـي بعيـنٍ تحـاتـي
وقفـي وخطواتـه يتـلـن معـلـوق
وخلانـي ماتنقـل عظامـي عبـاتـي
ودار الزمان ولا مشي الحظ بوفـوق
ومازلـت أخفـي بالظـلام اعبراتـي
ولا زلت أنا العب له علي كل طاروق
حتـي يجيـب الله مـوعـد وفـاتـي

====================


بريال عارضته على السوق بريال
من باعني برخيص والله لأبيعـه

من يشتري رجّال قصّر بالافعـال
باع العهـود الماضيـه للخديعـه

رجّال يسوى له ثمانيـن رجّـال
كل الصفات اللي ملكها فضيعـه

له ضحكةٍ تشبه لضحكات الأطفال
ذيبٍ ونظراتـه حنونـه وديعـه

وله فزعةٍ منها المجانيـن عقّـال
وفجوج لا ضاقت عليّ الوسيعـه

ياما عدل عوجا ثقيلات وطـوال
وأنامعاقبتـه غيـورٌ صريـعـه

والله يسوى لـه ثمانيـن رجّـال
والخبل مثلي لا زعل يب يبيعـه

======================

يسألوني عابـره ويـن الجديـد
والاجابـه ضايقـه فينـي ملـل
راحت ايام السعـادهوالقصيـد
عشتهـا بيـن التكانـه والجهـل
كنت اروض شارد الحرف العنيد
ماعسرني لو بغيته فـي عجـل
فيه اصور لوعة الحـب الاكيـد
ومنّه(اشكل) ماحوى قلبي غـزل
ومعه (اسافر) عن معاناتي بعيـد
ولأجل حبه ماشحنّي من زعـل
احضنه (فرحة) طفل في يوم عيد
واسكنه (روض) الخزاما والنفل
واحتويته ليت لي (قلـب ٍ) بليـد
ماعرف (فرق) الجزاله والهزل
والنهايه مابقـى عنـدي جديـد
واعذروني صارت ايامـي ملـل

=========

وهذي أخر قصيده لها الله يرحمهاااا


ودمتــــم

الموضوع الأصلي: مجموعة قصائد للشاعره عابرة سبيل الله يرحمها || الكاتب: بدر أبو عجرى || المصدر: منتدى الجبلان الرسمي

المصدر: ::منتدى الجبلان الرسمي::