قلت آه من سود العيون الحـور=وعكش الهدب والحاجب الفتـان
والليـل لامنّـه حلـك ديجـور=وعدى ظلامه النحـر وامتـان
والسيف لا سّله شديـد الجـور=وانا طعنـت بشـذرة الشامـان
وقطعة جليدن عضت المجمـور=تلمع كما برقن فهـق الامـزان
وخدن الى منه ضحك بسـرور=يانـه يـذكـرك بالـرمـان
وعسلجه لا منّه مشى بغـرور=هي مهرةٍ ماتعـرف الارسـان
ساعة نطحني والعيـون بحـور=والموج يغرق مركـب الربـان
هي عبرتي ؟ وقفت بوسط الزور=والا لساني خاب ماهو حصـان
ضاع الحكي وفي ضيعته معذور=من شاف حسنه مابغى السلوان
ولولا مخافـة خالـق الدبـور=سامع دبيـب النملـه الرحمـن
ان كان ابقطف من بعضه زهور=وماني موفر زاكـي الريحـان
أقفى ويوم أقفى تـرى معـذور=ولا يلحقـه لايـم ولا شرهـان
بيني وبينه الحـرس والسـور=وعلومٍ أثقل من جبـل ذهـلان
شفي بوصله والوصل محظور!!=واونتـي لـمفـارق الـخـلان
واونتي ونـة ضنـى المغـدور=لا جر قافـه بالرثـا واحـزان
يطري فقيـده ثـم دون شعـور=دارج دموعه تحـرق الاوجـان
او ونة اللي من هلـه ممـرور=ولا ضيم يذبح مثل ضيم اخـوان
العذق لو تضماه أدنـى جـذور=يموت ولو يرويه ماء الغـدران
والبيت من دون العمد مدمـور=مدمور يبقـى دون هالعمـدان
هذا ونيني وماحبسـت شعـور=لمفارقك يـا حـورة الأعيـان

الموضوع الأصلي: العيون الحور || الكاتب: بدر أبو عجرى || المصدر: منتدى الجبلان الرسمي

المصدر: ::منتدى الجبلان الرسمي::