ياللي تقـول الحـب سجـه ومـوال = نايم ولا حولك من الوقـت صحـوه
تعال خذ مـن دلـة الحـب فنجـال = فنجال هيلٍ من طبـخ وسـط قهـوه
الحب هـمٍ يطـوي الحـال والبـال = كم ليّـن بقلـبٍ دخـل فيـه قسـوه
لا صار لك نفسٍ لها عـز واجـلال = ولا انته بضاري تلحق الناس رجـوه
جنّب ترا فالحـب مخـرج ومدخـال = ماكل من يدخله يطلع برضوه
وانا عشيري كـل مـا قلتلـه قـال = ابشر وانا كلي علـى بعـض فـدوه
من باب حبـك جيتلـك عـز واذلال = اعطي ولا ني منتظر منـك عطـوه
يعني ملكت القلب من جـال لا جـال = ولا عاد له عني من النـاس غنـوه
يعني ما دام الشـوق بعروقنـا سـال = لاعاد يحسب قيض وقته وشتوه
ضلوعي وقت القيض له ستر واضلال = ووقت الشتاء صدري من البرد دفـوه
ياقـف ليـا وقفـت والقلـب ميـال = وان زدت خطوه زاد فالدرب خطـوه
يعني غلا يعني حـلا مالـه اشكـال = يعني في برج الحـب سويـت نـدوه
ما هو بحب ايميـل وعلـوم جـوال = وكلٍ علـى الثانـي مصـدّر بفتـوه
محتال يلعبله على شخـص محتـال = ولا يروي الضميـان ميـراد رغـوه
حبٍ على غير السنع نقـص واخـلال = ساعـة زمـن يقضيبهـا ذل شهـوه
يا عنك مـا يفـداه لوكـان بريـال = ان كـان ماهـو لاقـيٍ فيـه جـدوه
ما ضيّع النسوان يا كود رجال = ولا ضيّع الرجال ياكود نسوه