هواجيس فكري فكت الريق عقب الصوم
ثمان اسنـواتٍ طوحـت جوهـا هـادي
برمها قليل العرف لـو الامـر محسـوم
وتحيزمت له لو كان في راسـه عنـادي
يداحم شموخ مطير في سيفـه المثلـوم
يبا ينتقـص وهـو منقـوص وربـادي
بدانا المناكـخ بالادلـه ورفـع السـوم
وانا كفو للموقف وانـا نسـل عبـادي
تزوم الخصوم ولا ثنينـا لطمنـا الـزوم
وانا هاجسي في رفعـة مطيـر ينقـادي
ويا قوم ياللـي تعتـزي ضدنـا ياقـوم
علي الحرام ان من يعانـد لنـا غـادي
بديت وعلى وضح النقا ما عليّـه لـوم
حفيدٍ يفاخـر فـي تواريـخ الاجـدادي
جميع القبايـل كـوم لكـن حنـا كـوم
ويشهد لنا التاريـخ هجـري وميـلادي
بنمراً تهيل الضد تشدي لجيـش الـروم
تنشمي لا ثار الهيج في كسب الامجـادي
ليا ولع القـادح وقـوم بنحرهـا قـوم
نـدق المعـادي بالسطـر دق الاوتـادي
نبيع العمـار بسوقهـا والقـدر محتـوم
سطرنا يزوغ اذهـان خطـلان الاولادي
لعين الهنوف اللي طرف خدهـا مرقـوم
نذيق الخصم علقوم من مـر الاكبـادي
ليا ثارت الهيجا وراحت سحب وغيـوم
عسام المعـارك عندنـا عنبـر وكـادي
انشمي ليا صارت معاند وفـرك خشـوم
هل الاوله فـي كـل ميقـاف وطـرادي
صواريم فالموقف هـلاكٍ ورفعـة حـوم
على الجيش والا من على قب الاجيـادي
تعلم بنا الاكوان ماهـي بسـرد علـوم
ومناويخنا نـارٍ علـى روس الاشهـادي
هلاك الحريب ودايم النصـر لنـا تـوم
سيوفٍ تخيف الضد صلفـات وحـدادي
يروغ الخصم عنـا ولا يهتنـي بالنـوم
شهر ذكرنا بربـوع ارمـذات الاعمـادي
خذينا قـرون انحكـم ونفـذ المرسـوم
وعلى العز نبقى يوم بعض البشر بـادي
قناد الضفر والمعجزات وشتات خصـوم
فعول الفخر وإلهـا مواثيـق وسنـادي
تحت راي اخو جوزا وخشم العدو مخطوم
بنينا على صرح العـلا مجـد وشـدادي
حقيقة سطر عاقل بعـدّ الفعـل ملـزوم
تواريخ روسٍ نومست روس الاحفـادي
يشوش الخصم وليا عزمنا يعجز يقـوم
سواعيـر روسٍ فاللقـا مـا لنـا لادي
ندك العدا واللي ماهو كفو عنـه نشـوم
طواغيت حربٍ نرعب قلـوب الانـدادي
شجاعة وقطاعة وصملـه وقـو عـزوم
وطنخة ضفر وإقـدام بنـواع الانكـادي
مطيري وافاخر في ربوعـي وارد اللـوم
وفخري بربعي ما نقص قـدر الاجـوادي



القصيده للشاعر/ سعود القت المطيري

لاهنت على نقلك للقصيدة

والله يعطيك العافية